قصيدة يانوك مكتوبه
الرادود سيد فاقد الموسوي
كلمات سيد محمد الموسوي
يانوك وين تريدين .. محتار خليتي حسين
يانوك وياج اخذيني .. ممشاج والله يبجيني
~~~~~~~~~~
يانوك الطريق بعيد .. خاف يسولف اعليه
كليله وعلي حنيت .. يالعايفلك بنيه
يلتمن بنات الناس .. وانه الوحدي ليليه
سلميلي اعله راعي الماي .. مشتاكه لمحاجيه
يانوك سلميلي اعليهن .. ينشدن عماتي ادريهن
يانوك يمتى يردون .. سكنه وزينب نشديهن
~~~~~~~~~~
يانوك وين تريدين .. محتار خليتي حسين
يانوك وياج اخذيني .. ممشاج والله يبجيني
~~~~~~~~~~
يانوك استحي من حسين .. هاج هدومي صعديهه
خاف اعله التراب ينام . حدره فراش سويهه
واخذي وياج ترجيتي .. وعن حسين ضميهه
وكليله العليله تكول .. ذني تبرعت بيهه
يانوك كليله بحالي .. كلساع يفز دلالي
مشتاك لو شاف اضعون .. عبالي حسين الغالي
~~~~~~~~~~
يانوك وين تريدين .. محتار خليتي حسين
يانوك وياج اخذيني .. ممشاج والله يبجيني
~~~~~~~~~~
كلبي يدك واكول الباب .. ينشدني ويريد اخبار
يانوك شكثر ونيت .. وني يشيل منه الجار
اكوم البس عباتي .. لو كالو اجه الخطار
كل ضني يانوك حسين .. سير لو فرشت الدار
يركض دلالي شماله .. لو شاف جيه خياله
يانوك خالي الديوان .. وتراب متروسه ادلاله
~~~~~~~~~~
يانوك وين تريدين .. محتار خليتي حسين
يانوك وياج اخذيني .. ممشاج والله يبجيني
~~~~~~~~~~
خاف من السفر تعبان .. يابعد العيون ارتاح
حط راسك على هدومي .. مو باجر وراك ارماح
يلكتلي العتب طيحي .. ويهون العتاب وطاح
بس كلي صدك يحسين ..خدري سكينه منكم راح
مرسال بنتك ماجاكم .. ويكول رد عمتي وياكم
بليل خاف تحنون .. تلكون مكتوب هنا
~~~~~~~~~~
يانوك وين تريدين .. محتار خليتي حسين
يانوك وياج اخذيني .. ممشاج والله يبجيني
~~~~~~~~~~
