كلمات اخوي زينب كتلو عباسي مكتوبة
الرادود سيد فاقد الموسوي
كلمات الشاعر احمد المشرفاوي
اخــوي زينب كتلوا عـبـاسي
اخــوي رجَّعني مدنّگ راسي ..
حچي الشامت بده
صـاحـولـي الـعـده
خـطـيـه لـوَحَـده
اخــوي.. اخــوي..
ــــــــــــــــــــــــــــــــــــــــــــــــــــــــ
يالعيــون..
گولن گاعد اتحلم يالعيــون
يضحكون..
اشوف الوادم اگبالي يضحكون
يصيحون..
راح اليحمي نسوانك يصيحون..
لازم تنذبح صاحوا الصوبين
راح اتيه نسوانك يَـ لحسين
ولازم تنسحگ
وزينب تحترگ
صحت بس لا صدگ
اخــوي.. اخــوي..
ــــــــــــــــــــــــــــــــــــــــــــــــــــــــ
الضهر مال..
وگفت و گتله يَبن امي الضهر مال
عَلَي شال..
راسه و صفن و اتبسم عَلَي شال
بچه و گال..
ثاري هواي اشبهنَّك بچه و گال..
گلبك ينسمع بس لا ركض جاي
فدوه إيروحلك عباس و الماي
حضنته وكله دم
حرّكته انثلم
شيشيلك للخيم
اخــوي.. اخــوي..
ــــــــــــــــــــــــــــــــــــــــــــــــــــــــ
بعد وين..
الگه اليحرس اخيمچن بعد وين
تنشدين..
شلون الكافلچ بس لا تنشدين
تموتين..
يَزينب من تشوفينه تموتين..
امبين من مچانه اهواي مشيول
من الشط للنص مدنيته الخيول
كتر ماهو كتر
عل طف منتثر
صايحلي اشكثر
اخــوي.. اخــوي..
ــــــــــــــــــــــــــــــــــــــــــــــــــــــــ
يَمَگفاي..
الف چف ما يعدلَنك يَمَكفاي
ابممشاي..
يَزينب جيتچ اتهطر ابممشاي
اعله مبچاي..
اريدن كل مَرَه تبچي اعله مبچاي..
نطب للخيمه خاف اتشوفنه الناس
و لمي الحرم ونعيلي اعله عباس
لو عندي وكت
وياچن ثغَّبت
وبنصچن صحت
اخــوي.. اخــوي..
ــــــــــــــــــــــــــــــــــــــــــــــــــــــــ
الحسين..
يزينب تره اليمچ نص الحسين
تعرفين..
اخوي اهواي يازينب تعرفين
النساوين..
يستاهل لطم وي النساوين..
ما وفي اعله صدري اشما الطم حيل
راح الطم علي بحوافر الخيل
فرس تدفع فرس
ولا اگللهه بس
و اصيح اخر نفس
اخــوي.. اخــوي..
ــــــــــــــــــــــــــــــــــــــــــــــــــــــــ
اداء : سيد فاقد الموسوي
الشاعر : احمد المشرفاوي